mirī dāstān-e-hasrat vo sunā sunā ke ro.e
mire āzmāne vaale mujhe aazmā ke ro.e
koī aisā ahl-e-dil ho ki fasāna-e-mohabbat
maiñ use sunā ke ro.uuñ vo mujhe sunā ke ro.e
mirī aarzū kī duniyā dil-e-nā-tavāñ kī hasrat
jise kho ke shādmāñ the use aaj pā ke ro.e
tirī bevafā.iyoñ par tirī kaj-adā.iyoñ par
kabhī sar jhukā ke ro.e kabhī muñh chhupā ke ro.e
jo sunā.ī anjuman meñ shab-e-ġham kī āp-bītī
ka.ī ro ke muskurā.e ka.ī muskurā ke ro.e