hameñ ḳhabar hai vo mehmān ek raat kā hai
hamāre paas bhī sāmān ek raat kā hai
safīne barsoñ na rakkheñge sāhiloñ pe qadam
tumheñ gumāñ hai ki tūfān ek raat kā hai
hai ek shab kī iqāmat sarā-e-duniyā meñ
ye saarā khel mirī jaan ek raat kā hai
khulegī aañkh to samjhoge ḳhvāb dekhā thā
ye saarā khel mirī jaan ek raat kā hai
tumhārī shaan hamārī bisāt kyā hai yahāñ
shikoh-e-ḳhusrav-e-ḳhāqān ek raat kā hai
bas ek shab kā ujālā hai us ke dāman meñ
ki ye charāġh nigahbān ek raat kā hai