unheñ dekhte hī fidā ho ga.e ham

mohabbat meñ yuuñ mubtalā ho ga.e ham

mire lab pe aa.ī tamannā to bole

haTo chhoḌ jaao ḳhafā ho ga.e ham

zamāne se chhup kar mile the kisī se

zamāne ne dekhā judā ho ga.e ham

kabhī tū ne sochā kabhī tū ne samjhā

tire hijr meñ kyā se kyā ho ga.e ham

rah-e-ishq meñ thak ga.e chalte chalte

to raahī se ḳhud rahnumā ho ga.e ham

tabassum hañsī be-ruḳhī be-hijābī

tirī har adā par fidā ho ga.e ham

'hazīñ' koī itnā batā de ḳhudā-rā

javānī meñ kyuuñ pārsā ho ga.e ham