is dasht-e-suḳhan meñ koī kyā phuul khilā.e
chamkī jo zarā dhuup to jalne lage saa.e
sūraj ke ujāle meñ charāġhāñ nahīñ mumkin
sūraj ko bujhā do ki zamīñ jashn manā.e
mahtāb kā partav bhī sitāroñ pe girāñ hai
baiThe haiñ shab-e-tār se ummīd lagā.e
har mauj-e-havā sham.a ke dar pai hai azal se
dil se kaho lau apnī zarā aur baḌhā.e
kis kūcha-e-tiflāñ meñ chale aa.e ho 'shā.ir'
āvāza kase hai to koī sañg uThā.e