hamīñ ko bhuul ga.e aap ke bhī kyā kahne

yaqīñ ko bhuul ga.e aap ke bhī kyā kahne

mire ḳhayāl ko chorī kiyā kiyā so kiyā

zamīñ ko bhuul ga.e aap ke bhī kyā kahne

makāñ banāte rahe bām-o-dar sajāte rahe

makīñ ko bhuul ga.e aap ke bhī kyā kahne

asiir aam se chehre ke ho ke baiThe haiñ

hasīñ ko bhuul ga.e aap ke bhī kyā kahne

bajā ki haath ko thāmā bajā liyā bosa

jabīñ ko bhuul ga.e aap ke bhī kyā kahne

thā zikr mujh ko bhulāne kā haañ hī bol diyā

nahīñ ko bhuul ga.e aap ke bhī kyā kahne