sukūñ kā ek bhī lamha jo dil ko miltā hai

ye dil ḳhayāl kī vaadī meñ jā nikaltā hai

ye raushnī mire dil meñ tire ḳhayāloñ kī

ki ik charāġh sā vīrāñ-kade meñ jaltā hai

mahak rahī hai tirī yaad kī kalī aise

ki phuul jaise bayābāñ meñ koī khiltā hai

ḳhalā meñ merī nazar jab kahīñ aTaktī hai

tire vajūd kā paikar vahīñ pe Dhaltā hai

nazar meñ taare se 'shāhīñ' chamakne lagte haiñ

ye dil jo shiddat-e-jazbāt se machaltā hai