sochte rahnā yahī ġham-ḳhvār se ho kar alag
koī tanhā rah gayā 'ansār' se ho kar alag
kātib-e-taqdīr ne likhnā thā jo vo likh diyā
ab kahāñ jā.ūñ salīb-o-dār se ho kar alag
ek lamhe meñ utar jā.egā barsoñ kā ḳhumār
kyā karoge apne hī kirdār se ho kar alag
soch meñ Duubā huā huuñ maiñ imārat ke qarīb
gir paḌī kyuuñ chhat dar-o-dīvār se ho kar alag
yuuñ ba-zāhir kar rahā hai vo ta.alluq se gurez
jī nahīñ saktā magar 'ansār' se ho kar alag