saare aalam meñ nuur hai terā

har jagah par zuhūr hai terā

sharq se ġharb qaaf se tā-qāf

tazkira duur duur hai terā

dil-e-āshiq ko kyuuñ jalātā hai

ye bhī kyā koh-e-tūr hai terā

maiñ kahāñ aur terā naam kahāñ

sab karam kā vafūr hai terā

shab-e-furqat ko kyuuñ darāz kiyā

kyā ye roz-e-nushūr hai terā

us sitamgar kā kyā kareñ shikva

o re dil sab qusūr hai terā

rahm kar āsmāñ pe ai baarī

banda-e-pur-qusūr hai terā

is ko kahte haiñ anjum-e-āsī

naam rabb-e-ġhafūr hai terā