gardish kī raqābat se jhagḌe ke liye thā

jo ahd mirā titlī pakaḌne ke liye thā

jis ke liye sadiyāñ ka.ī tāvān meñ dī haiñ

vo lamha to miTTī meñ jakaḌne ke liye thā

hālāt ne kī jaan ke jab dast-darāzī

har sulh kā pahlū hī jhagaḌne ke liye thā

muñh zoriyāñ kyuuñ mujh se sazā-vār thiiñ us ko

phailāo jahāñ us kā sukaḌne ke liye thā

qurbān thiiñ bālīdgiyāñ naḳhl-e-talab par

kyā josh-e-numū aap ukhaḌne ke liye thā

paanī ne jise dhuup kī miTTī se banāyā

vo dā.era-e-rabt bigaḌne ke liye thā