us ke gulābī hoñT to ras meñ base lage
lekin badan ke zā.iqe be-kaif se lage
TuuTe qadam qadam pe jo apnī lachak ke saath
vo daldaloñ meñ zaat kī mujh ko phañse lage
tamsīl ban ga.e haiñ samundar kī jhaag kī
sahrā-e-ġham kī raakh meñ jo bhī dhañse lage
jin kā yaqīn rāh-e-sukūñ kī asaas hai
vo bhī gumān-e-dasht meñ mujh ko phañse lage
ham le ke be-amānī ko jañgal meñ aa ga.e
dil ko jo shahr-e-ḳhūbāñ meñ kuchh vasvase lage