niDar bhī zaat meñ apnī huuñ ḳhud se ḳhā.if bhī
lahū meñ mere hirā bhī hai arz-e-tā.ef bhī
yahī nahīñ ki farishta na chhat pe utrā koī
pahuñch sake na falak tak mire vazā.if bhī
pukārtī hai mujhe tere naam se duniyā
badal ke rakh diye tū ne mire kavā.if bhī
bharam aziiz thā terā so terī jānib se
ḳharīd laayā huuñ apne liye tahā.if bhī
kiyā hai saath hamāre jo zindagī ne 'munīr'
ravā rakhe na kisī se koī tavā.if bhī