sone vāloñ ko koī ḳhvāb dikhāne se rahā
maiñ tah-e-ḳhāk to ab ḳhaak uḌāne se rahā
koī darvāza na haa.il koī dahlīz rahī
ishq sahrā meñ rahā aur Thikāne se rahā
Duub jaa.eñ to kināre pe pahuñch sakte haiñ
ab samundar to hameñ paar lagāne se rahā
un diyoñ hī se kisī taur guzārā kar lo
ab maiñ kamre meñ sitāroñ ko to laane se rahā
apne hāthoñ hī shikār apnā maiñ kar luuñ na 'munīr'
aur kuchh der agar duur nishāne se rahā