ga.e zamāne kī sūrat badan churā.e vo

na.ī rutoñ kī tarah se bhī muskurā.e vo

hazār merī nafī bhī kare vo merā hai

ki mere hone kā ehsās bhī dilā.e vo

har ek shaḳhs yahāñ apne dil kā mālik hai

maiñ laakh us ko bulā.ūñ magar na aa.e vo

havā kī āhaTeñ suntā huuñ dhaḌkanoñ kī tarah

misāl-e-sham.a mujhe rāt-bhar jagā.e vo

mire badan ko lahū-rañg pairahan bhī de

mirī qabā se mire zaḳhm bhī chhupā.e vo

mirī ragoñ kā lahū bint-e-am se miltā hai

maiñ apnā aap bhī dekhūñ to yaad aa.e vo

tamām raat guzārī hai kirchiyāñ chunte

sahar huī to nayā aa.ina dikhā.e vo

mirā vajūd kitāboñ meñ harf harf huā

ḳhudā kare mirī āvāz ban ke aa.e vo

vo ek sho.ala-e-javvāla jo chhue jal jaa.e

magar ḳhud apne hī saa.e se ḳhauf khaa.e vo

ye kyā ki mujh ko chhupāyā hai merī nazroñ se

kabhī to mujh ko mire sāmne bhī laa.e vo

maiñ apne aap se niklā to sāmne vo thā

aur ab ye soch rahā huuñ kahīñ ko jaa.e vo

palaT chukā huuñ varaq zindagī ke ai 'aḳhtar'

harīm-e-shab meñ dabe paañv phir bhī aa.e vo