Sharib Lakhnavi

ek qayamat hai jawani ek qayamat hai shabab

Sharib Lakhnavi

ik qayāmat hai javānī ik qayāmat hai shabāb

har tabassum ek tūfāñ har nazar ik inqalāb

har taraf ek āh-o-zārī har taraf ek iztirāb

kitnī sauġhāteñ liye aayā hai daur-e-inqilāb

sāġhar-o-mīnā paTak de toḌ de chañg-o-rubāb

dekh sar par aa chukā hai āftāb-e-inqalāb

ishq ke dastūr duniyā se alag dastūr haiñ

is gumnāmī meñ shohrat is ḳhāmoshī javāb

ai mirī nazroñ jannat kyā tujhe ma.alūm hai

kis ke sadqe ho rahe haiñ āftab-o-māhtāb

maiñ to kahtā huuñ ḳhudā shukr karnā chāhiye

jaan de kar bhī jo ho jaa.e mohabbat kāmyāb

ai dil-e-ġham-āshnā ab to vo ham se chhuT ga.e

aur kyā is se ziyāda hogā koī inqalāb

un se bāteñ kar rahā huuñ vo khaḌe haiñ sāmne

jāgtā rahtā huuñ lekin dekhtā rahtā huuñ ḳhvāb

bandisheñ donoñ taraf pābandiyāñ donoñ taraf

ek pāband-e-mohabbat ek pāband-e-hijāb

mujh ko ai 'shārib' fishār-e-qabr kyā ḳhauf ho

maiñ ġhulām-e-shāh-e-yasrib maiñ ġhulām-e-bū-turāb

Top Urdushayar.com