māl-o-matā-e-kūcha-o-bāzār bik ga.e
ahd-e-havas meñ sab dar-o-dīvār bik ga.e
qasr-e-shahī meñ jubba-o-dastār bik ga.e
nīlām ghar meñ qāfila-sālār bik ga.e
jins-e-vafā ke chaav meñ aa.e the sub.h-dam
bolī lagī to ḳhud bhī ḳharīdār bik ga.e
shab bhar rahī fazā meñ vafā-dāriyoñ kī guuñj
sūraj chaḌhā to saare vafādār bik ga.e
vo zor thā girānī-e-jins-e-hunar kā aaj
maiñ ḳhud bhī bik gayā mire afkār bik ga.e
hosh-o-havās qalb-o-nazar sajda-o-qayām
ai ishq tere saare hī ġham-ḳhvār bik ga.e