ai mire dil kī raushnī to yūñhī jagmagā.e jā

mere jahān-e-shauq par kaif ban ke chhā.e jā

maiñ usī tarah se rahūñ mahv-e-nazzāra-e-jamāl

āñkhoñ meñ āñkheñ Daal kar tū yūñhī muskurā.e jā

terī nazar kā hai ḳhumār kahte haiñ jis ko duḳht-e-raz

dil kī havas kā vāsta mast nazar pilā.e jā

mere tasavvurāt meñ mere taḳhaiyyulāt meñ

ai merī jān-e-ārzū jalva-ba-jalva aa.e jā

tujh se nigāh milte hī dil se to haath dho chuke

ab hai faqat ye aarzū jaan se bhī miTā.e jā