hamāre lahje meñ behtar hai inkisārī ho
magar zabāñ pe jo baat aa.e sab pe bhārī ho
kisī ko Thes na pahuñche ye apnī koshish hai
magar lage jo kisī dil pe zarb kaarī ho
rah-e-hayāt meñ shāyad hī vo maqām aa.e
ki naġhma-hā-e-junūñ par sukūt taarī ho
vafā kā zikr agar aa.e us kī mahfil meñ
to baat jo bhī ho jaisī ho bas hamārī hai
tamām-umr guzārī hai us kī ḳhidmat meñ
hamāre naam kā sikka adab meñ jaarī ho
tire karam se hamesha hī ḳhush rahā 'anvar'
mire ḳhudā na kabhī lab pe āh-o-zārī ho