is se pahle ki nayā phir koī hamla ho jaa.e
jāgte rahiye yahāñ tak ki saverā ho jaa.e
ḳhud ko har samt se paanī meñ ghirā paatā huuñ
mujh pe allāh kare pyaas kā ġhalba ho jaa.e
jism meñ jism chhupā liije ki us se pahle
ThanD baḌh jaa.e havā kā koī hamla ho jaa.e
kab se vo sañg liye phirtā hai bechain udaas
aaj ai kaash mirā jism bhī shīsha ho jaa.e
roz har chehra nayā har na.ī poshāk ke saath
kaise har koī 'zafar' aap ke jaisā ho jaa.e