bagūloñ kī safeñ kirnoñ ke lashkar sāmne aa.e

qadam uTThe jidhar zaḳhmoñ ke patthar sāmne aa.e

thakan se TuuT kar jab ḳhvāb-e-rāhat kī tamannā kī

ridā-e-ġham liye kāñToñ ke bistar sāmne aa.e

darīda bādbāñ kamzor kashtī raat tūfānī

dahan khole syāhī ke samundar sāmne aa.e

talāsh-e-āb-e-haivāñ meñ jahāñ mere qadam pahuñche

vahāñ zahrāb se labrez sāġhar sāmne aa.e

ġharīb-e-shahr kis ke āstāne par sadā detā

ka.ī ghar raah meñ dekhe ka.ī dar sāmne aa.e

mire ḳhuddār lab par jab kabhī lafz-e-anā aayā

mirī qīmat lagāne kīsa-e-zar sāmne aa.e

mizāj aisā hai kuchh 'māhir' muravvat aa hī jaatī hai

koī shātir agar ma.asūm ban kar sāmne aa.e