junūñ meñ ham rah-e-ḳhauf-e-ḳhatar se guzre haiñ
jidhar se koī na guzre udhar se guzre haiñ
saf-e-salīb jahāñ intizār kartī thī
masīh-e-vaqt usī rahguzar se guzre haiñ
maiñ Duub Duub ke ubhrā huuñ har talātum se
hazār sail-e-ravāñ mere sar se guzre haiñ
jo kal the baiThe hue gesuoñ ke saa.e meñ
vo aaj taptī huī rahguzar se guzre haiñ
sukūt-e-shām meñ yādoñ ke kārvāñ 'māhir'
dil-e-tabāh ke ujḌe nagar se guzre haiñ