ye sard raat koī kis tarah guzāregā
havā chalī to lahū ko lahū pukāregā
ye sochte haiñ ki is baar ham se milne ko
vo apne baal kis andāz meñ sañvāregā
shikāyateñ hī karegā ki ḳhud-ġharaz nikle
vo dil meñ koī bullet to nahīñ utāregā
yahī bahut hai ki vo ḳhud nikhartā jaatā hai
kisī ḳhayāl kā chehra to kyā nikhāregā
yahī bisāt agar hai to ek roz 'faroġh'
jo ham se jiit chukā hai vo ham se hāregā