nikalnā ḳhud se mumkin hai na mumkin vāpsī merī
mujhe ghere hue hai har taraf se be-ruḳhī merī
bujhā ke rakh gayā hai kaun mujh ko tāq-e-nisyāñ par
mujhe andar se phūñke de rahī hai raushnī merī
maiñ ḳhvāboñ ke mahal kī chhat se gir ke ḳhud-kushī kar luuñ
haqīqat se agar mumkin nahīñ hai dostī merī
maiñ apne jism ke murda ajā.ib-ghar kī zīnat huuñ
mujhe dīmak kī sūrat chāTtī hai zindagī merī