jab pyaar nahīñ hai to bhulā kyuuñ nahīñ dete
ḳhat kis liye rakkhe haiñ jalā kyuuñ nahīñ dete
kis vāste likkhā hai hathelī pe mirā naam
maiñ harf-e-ġhalat huuñ to miTā kyuuñ nahīñ dete
lillāh shab-o-roz kī uljhan se nikālo
tum mere nahīñ ho to batā kyuuñ nahīñ dete
rah rah ke na taḌpāo ai be-dard masīhā
hāthoñ se mujhe zahr pilā kyuuñ nahīñ dete
jab us kī vafāoñ pe yaqīñ tum ko nahīñ hai
'hasrat' ko nigāhoñ se girā kyuuñ nahīñ dete