thī yaad kis dayār kī jo aa ke yuuñ rulā ga.ī

bas ek pal meñ jaise zindagī bhī Dagmagā ga.ī

gumāñ thā ye ki dab ga.iiñ vo hasratoñ kī bijliyāñ

ye kaun sī na.ī chamak bujhe diye jalā ga.ī

girā.īñ shāḳh shāḳh se ḳhizāñ ne phuul pattiyāñ

uḌe jo biij har taraf to phir bahār aa ga.ī

khulā nigāh-e-yār kā jo mai-kada to yuuñ lagā

ki pyaas ek umar kī bas ik nazar bujhā ga.ī

ḳhudā-qasam maiñ bach gayā ḳhatā kī tez dhaar se

junūñ kī ik adā thī jo mujhe yuuñ aazmā ga.ī

ye kyā huā ki ab tujhī se bad-gumāñ maiñ ho gayā

maiñ sochtā thā zindagī tū mujh ko raas aa ga.ī

milī hai 'āzim'-e-suḳhan ye kaisī tīrgī tujhe

tire ḳhayāl meñ jo itnī raushnī baḌhā ga.ī