miTTī jab tak nam rahtī hai
ḳhushbū tāza-dam rahtī hai
apnī rau meñ mast o ġhazal-ḳhvāñ
mauj-e-havā-e-ġham rahtī hai
un jhiil sī gahrī āñkhoñ meñ
ik lahar sī har dam rahtī hai
har saaz judā kyuuñ hotā hai
kyuuñ sañgat bāham rahtī hai
kyuuñ āñgan TeḌhā lagtā hai
kyuuñ pāyal barham rahtī hai
ab aise sarkash qāmat par
kyuuñ teġh-e-mizha ḳham rahtī hai
kyuuñ aap pareshāñ rahte haiñ
kyuuñ aañkh 'rasā' nam rahtī hai