shahr-e-be-saut meñ amaañ mil jaa.e
koī patthar mirī taraf hī aa.e
ik fasīl-e-havā na rañg na ruup
ik ḳhayāl-e-ḳhudā mujhe bahkā.e
merā chehra utārne vaalo
merī sūrat kise kise bahlā.e
niilā piilā ġhubār tanhā peḌ
mere āñgan meñ chāñd bhī ghabrā.e
khiḌkiyāñ apne jism kī kholo
kyā ajab dhuup shaam tak aa jaa.e
yaḳh-zada munjamid kohar-ālūd
kaun chaTTān se phisalne paa.e
muztarib raat chashm-e-nam 'īraj'
phuul shabnam ko bhī lahū rulvā.e