hujūm-e-ġham meñ kis zinda-dilī se
musalsal kheltā huuñ zindagī se
qarīb aate haiñ lekin be-ruḳhī se
purāne dost bhī haiñ ajnabī se
farishte dam-ba-ḳhud iblīs hairāñ
tavaqqo ye kahāñ thī aadmī se
nizām-e-asr-e-nau ye kah rahā hai
andhere phailte haiñ raushnī se
chale aa.e haram se mai-kade meñ
pareshāñ ho ga.e jab zindagī se
lagī hai aag jab se gulistāñ meñ
bahut Darne lagā huuñ raushnī se
na ho jo tarjumān-e-vaqt 'razmī'
bhalā kyā fā.eda us shā.irī se