ābla-pā koī is dasht meñ aayā hogā
varna āñdhī meñ diyā kis ne jalāyā hogā
zarre zarre pe jaḌe hoñge kuñvāre sajde
ek ik but ko ḳhudā us ne banāyā hogā
pyaas jalte hue kāñToñ kī bujhā.ī hogī
riste paanī ko hathelī pe sajāyā hogā
mil gayā hogā agar koī sunahrī patthar
apnā TuuTā huā dil yaad to aayā hogā
ḳhuun ke chhīñTe kahīñ pūchh na leñ rāhoñ se
kis ne vīrāne ko gulzār banāyā hogā