Meena Kumari Naz

chand tanha hai aasman tanha

Meena Kumari Naz

Mumbai, Maharashtra, India

1933-1972

chāñd tanhā hai āsmāñ tanhā

dil milā hai kahāñ kahāñ tanhā

bujh ga.ī aas chhup gayā taara

thartharātā rahā dhuāñ tanhā

zindagī kyā isī ko kahte haiñ

jism tanhā hai aur jaañ tanhā

ham-safar koī gar mile bhī kahīñ

donoñ chalte rahe yahāñ tanhā

jaltī-bujhtī raushnī ke pare

simTā simTā ik makāñ tanhā

raah dekhā karegā sadiyoñ tak

chhoḌ jā.eñge ye jahāñ tanhā

Top Urdushayar.com