vo ek shaḳhs ki baa.is mire zavāl kā thā

zamīñ se miltā huā rañg us ke jaal kā thā

dil o nigāh meñ jhagḌā bhī munfarid thā magar

jo faisla huā vo bhī baḌe kamāl kā thā

maiñ jaan dene kā da.avā vahāñ pe kyā kartā

jo mas.ala use darpesh thā misāl kā thā

maiñ chāhtā thā ki vo ḳhud-baḳhud samajh jaa.e

taqāzā us kī taraf se magar savāl kā thā

ye aur baat ki baazī isī ke haath rahī

vagarna farq to le de ke ek chaal kā thā

tamām umr gañvā dī jise bhulāne meñ

vo nisf maazī kā qissa thā nisf haal kā thā

maiñ pahle zaḳhm pe chauñkā thā dard se lekin

phir us ke ba.ad kise hosh indimāl kā thā