rut hai aisī ki dar-o-bām na saa.e hoñge

log palkoñ pe hasīñ ḳhvāb sajā.e hoñge

vaqt ke saath badal jaate haiñ chehre saare

aaj apne haiñ yahī log parā.e hoñge

log isī vaj.h se pathrāv kiyā karte haiñ

aap shīshe kī dukāñ ḳhuub sajā.e hoñge

raah hamvār na āsāñ thā husūl-e-manzil

hausle ham ne bahut apne gañvā.e hoñge

yūñhī ehsās-e-nadāmt to nahīñ un ko 'hasan'

apne hāthoñ se hī ghar apnā jalā.e hoñge