ab ḳhushī hai na koī dard rulāne vaalā

ham ne apnā liyā har rañg zamāne vaalā

ek be-chehra sī ummīd hai chehra chehra

jis taraf dekhiye aane ko hai aane vaalā

us ko ruḳhsat to kiyā thā mujhe ma.alūm na thā

saarā ghar le gayā ghar chhoḌ ke jaane vaalā

duur ke chāñd ko DhūñDo na kisī āñchal meñ

ye ujālā nahīñ āñgan meñ samāne vaalā

ik musāfir ke safar jaisī hai sab kī duniyā

koī jaldī meñ koī der se jaane vaalā