vaqt banjārā-sifat lamha ba lamha apnā

kis ko mālūm yahāñ kaun hai kitnā apnā

jo bhī chāhe vo banā le use apne jaisā

kisī ā.īne kā hotā nahīñ chehra apnā

ḳhud se milne kā chalan aam nahīñ hai varna

apne andar hī chhupā hotā hai rasta apnā

yuuñ bhī hotā hai vo ḳhūbī jo hai ham se mansūb

us ke hone meñ nahīñ hotā irāda apnā

ḳhat ke āḳhir meñ sabhī yuuñ hī raqam karte haiñ

us ne rasman hī likhā hogā tumhārā apnā