kabhī kisī ko mukammal jahāñ nahīñ miltā

kahīñ zamīn kahīñ āsmāñ nahīñ miltā

tamām shahr meñ aisā nahīñ ḳhulūs na ho

jahāñ umiid ho is kī vahāñ nahīñ miltā

kahāñ charāġh jalā.eñ kahāñ gulāb rakheñ

chhateñ to miltī haiñ lekin makāñ nahīñ miltā

ye kyā azaab hai sab apne aap meñ gum haiñ

zabāñ milī hai magar ham-zabāñ nahīñ miltā

charāġh jalte hī bīnā.ī bujhne lagtī hai

ḳhud apne ghar meñ hī ghar kā nishāñ nahīñ miltā