vo ḳhush-libās bhī ḳhush-dil bhī ḳhush-adā bhī hai

magar vo ek hai kyuuñ us se ye gila bhī hai

hamesha mandir-o-masjid meñ vo nahīñ rahtā

sunā hai bachchoñ meñ chhup kar vo kheltā bhī hai

na jaane ek meñ us jaise aur kitne haiñ

vo jitnā paas hai utnā hī vo judā bhī hai

vahī amiir jo rozī-rasāñ hai aalam kā

faqīr ban ke kabhī bhiik māñgtā bhī hai

akelā hotā to kuchh aur faisla hotā

mirī shikast meñ shāmil mirī duā bhī hai