apnī marzī se kahāñ apne safar ke ham haiñ

ruḳh havāoñ kā jidhar kā hai udhar ke ham haiñ

pahle har chiiz thī apnī magar ab lagtā hai

apne hī ghar meñ kisī dūsre ghar ke ham haiñ

vaqt ke saath hai miTī kā safar sadiyoñ se

kis ko mālūm kahāñ ke haiñ kidhar ke ham haiñ

chalte rahte haiñ ki chalnā hai musāfir kā nasīb

sochte rahte haiñ kis rāhguzar ke ham haiñ

ham vahāñ haiñ jahāñ kuchh bhī nahīñ rasta na dayār

apne hī kho.e hue shaam o sahar ke ham haiñ

gintiyoñ meñ hī gine jaate haiñ har daur meñ ham

har qalamkār kī be-nām ḳhabar ke ham haiñ