jīvan hai pal pal kī uljhan kis kis pal kī baat kareñ
in lamhoñ ko bhuul ke ham tum giit ġhazal kī baat kareñ
roz hī piinā roz pilānā roz ġhamoñ se Takrānā
ik din mai ko bhuul ke aao gañgā-jal kī baat kareñ
sau barsoñ ke is jiine se hāsil kyā ho pā.egā
jis ne dil ko ḳhushiyāñ dī hoñ us ik pal kī baat kareñ
kyā paayā hai bhiiḌ meñ kho kar kyā paaya tanhā.ī meñ
aao yaaro in rasmoñ ke pher-badal kī baat kareñ
aaj vafā kī raah 'musāfir' dhundlī dhundlī lagtī hai
kohra jis ne barsāyā hai us bādal kī baat kareñ