chāqū se mohabbat kī rageñ kaaT rahā hai
sunte haiñ ki vo ishq meñ nākām huā hai
pīchhe tire ai shoḳh-nazar husn ke paikar
ik shaḳhs nahīñ saarā zamāna hī paḌā hai
yāroñ ne mire aah kahīñ kā nahīñ chhoḌā
Thokar jo lagī mujh ko to andāza huā hai
vo haal jo añgrezoñ ne bhārat kā kiyā thā
kuchh haal vahī ishq ne ab merā kiyā hai
raste ke har ik ḳhatre se bachte hue ik din
manzil pe mirā qāfila pahuñchā to luTā hai
vo bāñjh zamīñ jis ko kisī ne nahīñ pūchhā
'jālib' ne use sīñch ke shādāb kiyā hai