ḳhaak hai merā badan ḳhaak hī us kā hogā

donoñ mil jaa.eñ to kyā zor kā sahrā hogā

phir mirā jism mirī jaañ se judā hai dekho

tum ne Tāñkā jo lagāyā thā vo kachchā hogā

tum ko rone se bahut saaf huī haiñ āñkheñ

jo bhī ab sāmne aa.egā vo achchhā hogā

roz ye soch ke sotā huuñ ki is raat ke ba.ad

ab agar aañkh khulegī to saverā hogā

kyā badan hai ki Thahartā hī nahīñ āñkhoñ meñ

bas yahī dekhtā rahtā huuñ ki ab kyā hogā