vasl kī raat meñ ham raat meñ bah jaate haiñ

vasl kab karte haiñ jazbāt meñ bah jaate haiñ

āb-jū ham haiñ pa dariyā ke hamāre sabhī ḳhvāb

radd-e-ta.abīr kī barsāt meñ bah jaate haiñ

baar baar aate haiñ ham apne hamal meñ lekin

shahr kī sāzish-e-isqāt meñ bah jaate haiñ

jism ke apne bhī jaadū haiñ pa kachche haiñ abhī

ruuh kī mashq-e-tilismāt meñ bah jaate haiñ

tah-e-dariyā-e-karam der se khultī hai so ham

uupar uupar kī ināyāt meñ bah jaate haiñ

ḳhatm-e-majlis pe na aayā kabhī ronā ham ko

saare aañsū to shurūāt meñ bah jaate haiñ