achchhe haiñ fāsle ke ye taare sajāte haiñ

jitnā qarīb jaao nazar daaġh aate haiñ

vo raa.e dete haiñ yahāñ jo haar jaate haiñ

jo jiit jaate haiñ vo kahānī sunāte haiñ

qillat baḌī hai vaqt kī kyā rū-ba-rū mile

ab log sirf phone se rishte nibhāte haiñ

kis tarah lā.ūñ apne laboñ tak maiñ hāl-e-dil

hai mas.ala laboñ kā ki ye muskurāte haiñ

lab pe kabhī Thahartī nahīñ der tak hañsī

ġham mere dil ke dasht meñ ḳheme lagāte haiñ