lagā ke ġhota samundar meñ tum guhar DhūñDo
kamāl jiine meñ hai jiine ke hunar DhūñDo
muqaddaroñ se hī sab kuchh to mil nahīñ saktā
shajar lagāo to mehnat ke phir samar DhūñDo
uḌaan bharne ke hai vāste falak saarā
haiñ bāzuoñ meñ jo pinhāñ vo bāl-o-par DhūñDo
har ek raat meñ to chāñdnī nahīñ khiltī
dahak rahā hai kahīñ tum meñ hī qamar DhūñDo
guzar ke aag se Dhaltā hai sonā zevar meñ
agar sañvarnā hai 'tāsīr' shola-gar DhūñDo