ḳhud ko tamāshā ḳhuub banātā rahā huuñ maiñ
qīmat bhī sādgī kī chukātā rahā huuñ maiñ
yuuñ bhiiḌ meñ to luTnā baḌī aam baat hai
sahrā meñ ḳhud ko tanhā luTātā rahā huuñ maiñ
manzil kī justujū bhī ajab shai hai dosto
Thokar se zaḳham apne lagātā rahā huuñ maiñ
kar ke kisī ko ḳhvār bahut hañstā hai bashar
sah ke sitam bhī ḳhud ko hañsātā rahā huuñ maiñ
kartā thā jab 'sabā' ko zamāna bhī nā-murād
himmat se azm aur baḌhātā rahā huuñ maiñ