ḳhud hijāboñ sā ḳhud jamāl sā thā
dil kā aalam bhī be-misāl sā thā
aks merā bhī ā.inoñ meñ nahīñ
vo bhī kaifiyat-e-ḳhayāl sā thā
dasht meñ sāmne thā ḳhema-e-gul
dūriyoñ meñ ajab kamāl sā thā
be-sabab to nahīñ thā āñkhoñ meñ
ek mausam ki lā-zavāl sā thā
ḳhauf andheroñ kā Dar ujāloñ se
sāneha thā to hasb-e-hāl sā thā
kyā qayāmat hai hujla-e-jāñ meñ
us ke hote hue malāl sā thā
jis kī jānib 'adā' nazar na uThī
haal us kā bhī mere haal sā thā