mere ash.ār tamavvuj pe jo aa.e hue haiñ
aab hairat se ye mazmūn uThā.e hue haiñ
shoḳhiyāñ kaam na aa.iiñ to hayā dhar legī
us ne āñkhoñ ko ka.ī daav sikhā.e hue haiñ
kuchh sitāre mirī palkoñ pe chamakte haiñ abhī
kuchh sitāre mire siine meñ samā.e hue haiñ
ab vo insān kahāñ jin se farishte sharmā.eñ
ham to insān kā bas bhes banā.e hue haiñ
ġhair ko jam.a karo dushman-e-jāñ ko bulvāo
dosto ham kisī apne ke satā.e hue haiñ