havā ke vaar pe ab vaar karne vaalā hai
charāġh bujhne se inkār karne vaalā hai
ḳhudā kare ki tirā azm barqarār rahe
zamāna raah meñ dīvār karne vaalā hai
vahī dikhā.egā tujh ko tamām daaġh tire
jise tū ā.ina-bardār karne vaalā hai
ye vaar to kabhī ḳhālī nahīñ gayā merā
koī to us ko ḳhabar-dār karne vaalā hai
usī ne rañg bhare haiñ tamām phūloñ meñ
vahī shajar ko samar-dār karne vaalā hai
zamīn bech ke ḳhush ho rahe ho tum jis ko
vo saare gaañv ko bāzār karne vaalā hai