uns to hotā hai dīvāne se dīvāne ko
koī apnā ke dikhā.e kabhī anjāne ko
ḳhud-kushī jaisā koī jurm nahīñ duniyā meñ
koī batlātā nahīñ jā ke ye parvāne ko
sāqī-e-vaqt ne jab chhīn lī hāthoñ se sharāb
maiñ ne Takrā diyā paimāne se paimāne ko
ḳhāk-zāda nahīñ paidā huā aisā koī
jo haqīqat meñ badal de mire afsāne ko
abrha jaisā agar ho gayā paidā koī
kyā bachā pā.eñge ham apne ḳhudā-ḳhāne ko
ek mufsid kī ye phailā.ī huī hai afvāh
rāt-bhar sham.a se nafrat rahī parvāne ko