nafī ko qarya-e-isbāt se nikāltā huuñ

maiñ apnī zaat tirī zaat se nikāltā huuñ

kashīd kartā huuñ maiñ din kī aag se ThanDak

aur apnī dhuup kahīñ raat se nikāltā huuñ

tū ek ruḳh pe hai mahv-e-kalām lekin maiñ

ka.ī ma.ānī tirī baat se nikāltā huuñ

duā ke haale banā kar tire jamāl ke gird

tujhe maiñ gardish-o-āfāt se nikāltā huuñ

mirā kamāl maiñ apnī bulandiyāñ 'shahzād'

haqīr-o-past maqāmāt se nikāltā huuñ