sabhī kuchh ḳhaak meñ tahlīl hotā jā rahā hai

chalo ye shahr bhī tabdīl hotā jā rahā hai

kisī kī guftugū meñ ek vo mafhūm hai jo

haqā.eq se alag tarsīl hotā jā rahā hai

maiñ kaise tark kar duuñ ab ki ye kār-e-mohabbat

kisī ke hukm kī ta.amīl hotā jā rahā hai

maiñ kyā tartīb denā chāhtā huuñ aur mujh se

ye kyā hai jo yahāñ tashkīl hotā jā rahā hai

nahīñ khultā ye kaisā ḳhauf hai jo lamha lamha

sabhī ke ḳhuun meñ tahlīl hotā jā rahā hai