bāvre man kī bāvrī ḳhushbū

gītoñ ġhazloñ sī mohnī ḳhushbū

mausam-e-ishq kā payām liye

āsmānī sī āshiqī ḳhushbū

yā ḳhudā kyā hai sāhirī tauba

ḳhud hī bhar-bhar ke lauTtī ḳhushbū

gahrī gahrī sī jhāñktī andar

man samundar ko nāptī ḳhushbū

kaalī rātoñ meñ jaane ġham kyuuñ hai

luktī chhuptī sī sāñvarī ḳhushbū

ban ke alfāz har sū raushan hai

'mīr' kī jaise shā.erī ḳhushbū

le ke jazbāt apne hoñToñ pe

rah ga.ī chup sī boltī ḳhushbū